Azam Ali A Chantar M'er
A chantar m'er de so qu'eu no voleria
Tant me rancur de lui cui sui amia;
Car eu l'am mais que nuilha ren que sia:
Vas lui no'm val merces ni cortesia
Ni ma beltatz, ni mos pretz, ni mos sens;
C'atressi'm sui enganad' e trahïa
Com degr' esser, s'eu fos dezavinens
D'aisso'm conort, car anc non fi failhenssa
Amics, vas vos per nuilha captenenssa;
Anz vos am mais non fetz Seguis Valenssa
E platz mi mout quez eu d'amar vos venssa
Lo mieus amics, car etz lo plus valens;
Mi faitz orguoilh en digz et en parvenssa
Et si etz francs vas toutas autras gens
Be'm meravilh com vostre cors s'orguoilha
Amics, vas me, per qu'ai razon qu'eu'm duoilha;
Non es ges dreitz c'autr' amors vos mi tuoilha
Per nuilha ren qu'eu's diga ni acuoilha
E membre vos cals fo'l comenssamens
De nostr'amor! Ja Dompnedeus non vuoilha
Qu'en ma colpa sia'l departimens
Valer mi deu mos pretz e mos paratges
E ma beltatz e plus mos fins coratges;
Per qu'eu vos mandad lai on es vostr' estatges
Esta chansson, que me sia messatges:
Eu vuoilh saber, lo mieus bels amics gens
Per que vos m'etz tant fers ni tant salvatges;
No sai, si s'es orguoilhs o mal talens
Mais aitan plus vuoilh li digas, messatges
Qu'en trop d'orguoilh o ant gran dan maintas gens