Carmen Consoli Mamma Tedesca
[Strofa 1]
Mamma tedesca
Quannu t'arriva sta littra
A lu ritrattu di lu to figghiu appizzala
Ntra ddu paisi nicu e luntanu
Cu è ca ti scrivi è ′n surdatu 'talianu
Ca ti livau lu beni cchiu caru
E ora è vacanti lu so lettu biancu
[Strofa 2]
Mamma tedesca
Quannu t'arriva sta littra
Stramalidici sta manu ca scavau la fossa
E maliditta dda notti e ′i cannuna
Lu scantu, li stiddi, l′odiu e li bummi
Li acqui do Piavi, lu sgrusciu e i lamenti
Era beddu to figghiu mentri durmeva
'ppi sempri
[Ritornello]
Ti vitti chianciri e priari li santi
A lu capizzu d'o lettu vacanti
E sempri ti vitti poi ca turnai
Ccu l′autri surdati e dda t′attruvai
Lu trenu firmava
E lu suli era duci
Dda 'mmenzu fuddi di matri filici
Tu mi taliavi, misa all′agnuni
'nta l′occhi purtavi to figghiu ccu li manu 'ncruci
[Strofa 3]
Mamma tedesca
Quannu t′arriva sta littra
A lu ritrattu di lu to figghiu appizzala
Tu lu criscisti cc'o ciatu e ′i suspira
Era 'n preju abbrazzallu e virillu jucari
Lu m′insignava a pigghiari la mira
E sparari ppi megghiu putillu ammazzari
Mamma tedesca
Ti viu 'ntra dda cammara sula
[Ritornello]
Ti vitti chianciri e priari li santi
A lu capizzu d'o lettu vacanti
E sempri ti vitti poi ca turnai
Ccu l′autri surdati e dda t′attruvai
Lu trenu firmava
E lu suli era duci
Dda 'mmenzu fuddi di mammi filici
Lu trenu firmava, era tempu di paci
Tu mintevi li ali e 'ddumavi 'na luci
[Strofa 4]
Mamma tedesca
Mamme di tutta la terra
Supra di mia ognuna jttassi ′na petra
Muntagni di petra supra ′a me testa
Muntagni e muntagni di petra
Scacciati la guerra!
